Монголын хөрөнгийн бирж, Лондонгийн хөрөнгийн бирж групп болон Төрийн өмчийн хороо хамтран дотоодын хөрөнгийн зах зээлийг хөгжүүлэх зорилго бүхий "Ажлын мастер гэрээ"-г үзэглэн стратеги болон менежментийн түвшинд хамтран ажиллаж эхэлсэн цагаас хойш хоёр жилийн хугацаанд олон зорилтот ажлуудыг цаг хугацаанд нь хэрэгжүүлэн гүйцэтгэж олон нийтэд мэдээлэн хүргэж байсан билээ.
Гэрээнд тусгагдсан олон ажлуудын нэг болох Милленниум Ай Ти цогц системийг 2012 оны 7 дугаар сарын 2-ны өдөр Төлбөр тооцооны Т+3 аргачлалын хамтаар зах зээлд нэвтрүүлсэн бол өнөөдөр тус системийн давуу талуудын нэг болох зайнаас арилжаанд оролцох технологийн шийдэл, дэд бүтцийг бэлэн болгож брокерууд тус тусын оффисоос өдөр тутмын арилжаанд оролцох шинэ боломж нээгдээд байна.
Цаашилбал, энэхүү дэд бүтцийг ашиглан брокерууд өөрсдийн дотоод үйл ажиллагааны систем /Back office/ болон харилцагчдад хандсан цахим апликэйшн /Front office/ зэргийг шинэчлэн боловсронгуй болгосноор харилцагчийн захиалгыг онлайн хэлбэрээр хүлээн авч арилжаанд оролцох боломж бүрдэх юм.
Мэдээллийн Алба
МОНГОЛЫН ХӨРӨНГИЙН БИРЖ