“Монголын Хөрөнгийн Бирж” ТӨХК /МХБ/ нь гүйцэтгэх болон удирдах түвшний ажлын байранд эмэгтэйчүүдийн оролцоог дэмжиж, жендерийн тэгш байдлыг хангахад анхааран ажилладаг бөгөөд тэгш оролцоог бусад байгууллагуудад уриалах зорилгын хүрээнд Олон Улсын Санхүүгийн Корпораци /ОУСК/, Тогтвортой хөрөнгийн биржүүдийн санаачлага, НҮБ-ын Глобал Компактын Монгол Улс дахь сүлжээ байгууллага, НҮБ-ын Эмэгтэйчүүдийн байгууллага, МҮХАҮТ-ын дэргэдэх Бизнес Эрхлэгч Эмэгтэйчүүдийн зөвлөл зэрэг байгууллагуудтай хамтран “Жендерийн тэгш байдлын төлөө хонх цохих” ёслолын арга хэмжээг жил бүрийн "Эмэгтэйчүүдийн эрхийг хамгаалах өдөр"-ийг тохиолдуулан зохион байгуулж ирсэн уламжлалтай. 

Бизнес болон тогтвортой хөгжилд жендерийн тэгш байдлын чухлыг олон нийтэд таниулах зорилготой тус арга хэмжээг энэ жил дэлхийн 85 бирж зохион байгуулж байгаа бөгөөд МХБ нь энэ жил олон улсад тархаад буй COVID-19 вирустай холбоотой онцгой нөхцөл байдлын улмаас тус арга хэмжээг цуцлаад байна. 

Жендерийн тэгш оролцоог хангах нь хүний эрх, эрх чөлөөний шударга зарчмыг хэрэгжүүлэхийн зэрэгцээ бизнесүүд, байгууллагууд бүрэн хүчин чадлаа дайчлан ажиллах, ажлын үр дүнг үнэмлэхүй хэмжээнд нэмэгдүүлдэг болох нь дотоод, гадаадын олон судалгаа, практик туршлагаар батлагдсан байдаг. Иймд МХБ-ийн зүгээс жендерийн тэгш оролцоог хангаж ажиллахыг хөрөнгийн зах зээлийн оролцогч бусад байгууллагууд, бүртгэлтэй хувьцаат компаниуд, гишүүн компаниуддаа хандан уриалж байна. 

МОНГОЛЫН ХӨРӨНГИЙН БИРЖ