“Монголын хөрөнгийн бирж” ХК-иас сар тутам “Үнэт цаасны зах зээлийн анхан шатны мэдлэг олгох танхимын сургалт”-ыг зохион байгуулдаг. Сургалт 2025 оны 8 дугаар сарын 18, 19, 20-ны өдрүүдэд зохион байгуулагдаж өндөрлөлөө.

Энэ удаагийн сургалтад нийт 46 суралцагч хамрагдсанаас Өмнөговь аймгаас 20 гаруй, Хан-Уул дүүргээс 4 суралцагч тус тус албан газруудынхаа захилгаар суралцсан юм.

Энэ үеэр Монголбанкны Өмнөговь аймаг дахь хэлтсийг төлөөлөн сургалтад хамрагдсан Б.Наранхүүтэй цөөн хором ярилцлаа.

         -Танай аймгаас нэлээд олон хүн сургалтад хамрагдсан байна. Аль байгууллагаас зохион байгуулсан бэ?

     -Өмнөговь аймгийн Засаг даргын тамгын газар болон Монголбанкны Өмнөговь аймаг дахь хэлтэс хамтын ажиллагааны санамж бичиг байгуулж, энэ хүрээндээ Өмнөговь аймгийн иргэдийг улсдаа “Санхүүгийн боловсролоор тэргүүлэх аймаг” болох зорилт тавин ажиллаж байгаа юм. Энэхүү зорилтын хүрээнд орон нутгийн сум, байгууллагуудад Хөрөнгийн зах зээлийн чиглэлээр мэдлэг, мэдээлэл олгох сургагч багш бэлтгэх шаардлагатай болсон. Тиймээс санхүүгийн чиглэлээр ажилладаг багш нараа чадавхжуулах сургалтад хамруулъя гэж зорьсон. Бид аймгаасаа хорин гурвуулаа ирсэн. Насан туршийн боловсролын төвийн багш нар болон, Монголбанкны санхүүгийн сургагч багш нар ирж сургалт мэдээлэл авлаа. Багш суурьтай хүмүүсээ сургах нь илүү үр дүнтэй гэж үзсэн.

Түүнчлэн Өмнөговь аймаг удахгүй хөрөнгийн зах зээлд 500 тэрбум төгрөгийн бонд гаргах бэлтгэл ажлаа хангаж байна. Мөн Засгийн газраас ТӨХК-иудыг Монголын хөрөнгийн бирж дээр IPO гарган олон нийтийн компани болгох бодлого баримталж байгаа учраас хөрөнгийн зах зээлийн талаарх мэдлэг мэдээллийг ард иргэддээ хүргэх зайлшгүй шаардлагатай. Тиймээс Өмнөговь аймгийн удирдлагууд энэ тал дээр ихээхэн ач холбогдол өгч ажиллаж байгаа. 

          -Сургалтын хөтөлбөр, багш нарын заах арга барилыг дүгнэвэл?

         -Сургалтын хөтөлбөр, агуулга таалагдлаа. Анхан шатны ойлголтыг хангалттай хэмжээнд авсан гэж үзэж байна.

МОНГОЛЫН ХӨРӨНГИЙН БИРЖ